Xəbərlər

ETİHİ üzvləri Müəllimlərin XXII Yay İdman Oyunlarını 6 medalla başa vurublar

Bolqarıstanın Albena şəhərində keçirilən Müəllimlərin XXII Yay İdman Oyunlarına yekun vurulub.

Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirak etdiyi beynəlxalq yarışlarda Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqının (ETİHİ) təmsilçiləri uğurlu nəticələr əldə ediblər.

ETİHİ təmsilçiləri yarışları 4 birincilik və 2 üçüncülük olmaqla, ümumilikdə 6 mükafatla başa vurublar.

Mini-futbol üzrə komandamız final görüşündə Polşa təmsilçisini 5:4 hesabla məğlub edərək turnirin qalibi olub.

Stolüstü tennis üzrə komanda yarışlarında qadınlardan ibarət komandamız 1-ci, kişilərdən ibarət komandamız isə 3-cü yeri tutub.

Qadınlar arasında stolüstü tennis üzrə fərdi yarışda Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbinin məşqçi-müəllimi Rüfət Əliyeva 1-ci, Xətai rayonu 56 saylı tam orta məktəbin müəllimi Xəyalə Qiyasova isə 3-cü yeri tutub. Şahmat üzrə fərdi yarışda isə Şəmkir rayonu Kimya və Biologiya Təmayüllü Liseyinin müəllimi Bünyad Əsgərov 1-ci yerə layiq görülüb.

Sonda qaliblər Bolqarıstan Müəllimlər Birliyinin prezidenti Yanka Takeva, Bolqarıstan Müstəqil Həmkarlar İttifaqları Konfederasiyasının vitse-prezidenti Todor Kapitanov, Bolqarıstan İşçilərinin İdman və Sağlamlıq Federasiyasının prezidenti, Balkan İşçi İdmanı Assosiasiyasının vitse-prezidenti Desislava Yagodin və Varna şəhərinin meri Blagomir Kotsev tərəfindən kubok və medallarla təltif olunublar.

Beynəlxalq yarış təhsil işçiləri arasında sağlam həyat tərzinin təşviqində, eləcə də həmkarlar ittifaqı üzvləri arasında dostluq və əməkdaşlıq əlaqələrinin inkişafında mühüm rol oynayır.

Qeyd edək ki, 2004-cü ildən etibarən keçirilən bu yarışlarda Ümummilli Lider Heydər Əliyevin anadan olmasının ildönümünə həsr olunmuş respublika idman yarışlarında yüksək nəticələr göstərərək seçilmiş ittifaq üzvləri iştirak edirlər.

ETİHİ üzvləri Müəllimlərin XXII Yay İdman Oyunlarında uğurla çıxış edirlər

Bolqarıstanın Albena şəhərində Təhsil üzrə Avropa Həmkarlar İttifaqı Komitəsinin (ETUCE) üzv təşkilatlarının nümayəndələrinin iştirakı ilə Müəllimlərin XXII Yay İdman Oyunları keçirilir.

Azərbaycan Həmkarlar İttifaqları Konfederasiyasının üzv təşkilatı Elm və Təhsil İşçiləri Həmkarlar İttifaqının (ETİHİ) üzvləri də bu beynəlxalq yarışlarda iştirak edirlər.

Azərbaycan təmsilçiləri mini-futbol, stolüstü tennis, basketbol, çimərlik voleybolu və şahmat olmaqla 5 idman növündə mübarizə aparırlar.

Avqustun 27-28-də keçirilən yarışlarda ittifaq üzvlərimiz bir sıra uğurlu nəticələr əldə ediblər.

Mini-futbol üzrə komandamız qrup mərhələsini 6 xalla başa vuraraq yarımfinala yüksəlib. Yarımfinalda Bolqarıstanın “Vraça” komandasını 3:1 hesabı ilə məğlub edən təmsilçilərimiz finala vəsiqə qazanıblar.

Stolüstü tennis üzrə qadın və kişi komandalarımız da qrup mərhələsində keçirdikləri bütün qarşılaşmalarda qələbə qazanıblar. Qadınlardan ibarət komandamız 6 xalla, kişilərdən ibarət komandamız isə 8 xalla qrup mərhələsini lider kimi başa vuraraq final mərhələsinə yüksəliblər.

Şahmat üzrə fərdi yarışlarda Şəmkir rayon Kimya-biologiya təmayüllü liseyin müəllimi Bünyad Əsgərov I yeri tutub. O, həlledici qarşılaşmada Polşanın “ZNP” komandasının təmsilçisinə qalib gələrək yarışın qalibi olub.

Qeyd edək ki, Müəllimlərin Yay İdman Oyunları 2004-cü ildən etibarən ənənəvi olaraq hər il Bolqarıstanda keçirilir. Oyunlarda Ümummilli Lider Heydər Əliyevin anadan olmasının ildönümlərinə həsr edilən ölkədaxili idman yarışlarında yüksək nəticələr göstərərək münsiflər heyəti tərəfindən seçilən ittifaq üzvlərimiz iştirak edirlər.

Yarışlar avqustun 30-dək davam edəcək.

Müəllimlərə onlayn qeydiyyatla bağlı dəstək göstərilir

Elm və Təhsil İşçiləri Həmkarlar İttifaqının Göyçay Rayon Komitəsində müəllimlərin sanatoriya və istirahət mərkəzlərinə onlayn qeydiyyatı ilə bağlı müraciətləri davam edir.

Qeydiyyatdan keçmək istəyən müəllimlərə onlayn müraciət prosesinin düzgün həyata keçirilməsi ilə bağlı ətraflı məlumat verilir, lazımi təlimat və praktiki köməklik göstərilir.

Müəllimlərin elektron qeydiyyat zamanı qarşılaşdıqları çətinliklərin aradan qaldırılması, prosesin düzgün və rahat şəkildə həyata keçirilməsi üçün Rayon Komitəsi tərəfindən müvafiq dəstək göstərilir.

Müəllimlərə göstərilən bu xidmət onların istirahət imkanlarından daha rahat və əlçatan şəkildə yararlanmasına şərait yaradır.

Göyçaylı müəllim Şəbnəm Məmmədovanın uğurlu təhsil yolu və yüksək nəticəsi təqdir olunur

Təhsilin inkişafı yolunda peşəkarlığı, zəhməti və əldə etdiyi uğurlarla seçilən müəllimlərin fəaliyyəti hər zaman yüksək qiymətləndirilir.

Məmmədova Şəbnəm Nizami qızı 1994-cü ildə Göyçay rayonunun Cəyirli kəndində anadan olmuşdur. 2011-ci ildə Bakı Dövlət Universitetinin Tarix fakültəsinə qəbul olmuş, ali təhsilini uğurla başa vurduqdan sonra 2019–2020-ci tədris ilində Gəncə Dövlət Universitetində yenidənhazırlanma təhsilini tamamlamışdır.

2021-ci ildə müəllimlərin işə qəbulu (MİQ) imtahanında mümkün 60 baldan 59 bal toplayaraq yüksək nəticə göstərmiş və əmək fəaliyyətinə Göyçay rayonu Şıxbəy kənd ümumi orta məktəbində tarix müəllimi kimi başlamışdır.

2024-cü ildə müəllimlərin yerdəyişmə müsabiqəsində uğur qazanaraq Göyçay rayonu Kürdəmiş kənd tam orta ümumtəhsil məktəbində pedaqoji fəaliyyətini davam etdirmişdir.

Şəbnəm Məmmədova 24 iyun 2026-cı il tarixində keçirilən müəllimlərin sertifikatlaşdırma imtahanında da 60 mümkün baldan 59 bal toplayaraq peşəkarlığını bir daha nümayiş etdirmiş və növbəti uğuruna imza atmışdır.

ETİHİ Göyçay Rayon Komitəsi adından Şəbnəm Məmmədovanı qazandığı bu yüksək nailiyyət münasibətilə səmimi qəlbdən təbrik edir, ona gələcək pedaqoji fəaliyyətində yeni uğurlar, möhkəm cansağlığı və şagirdlərinin uğurları ilə daim qürur duymağı arzulayırıq. İnanırıq ki, onun zəhməti və fədakarlığı gələcək nəsillərin savadlı və vətənpərvər ruhda yetişməsinə mühüm töhfələr verməyə davam edəcək.

Təqaüdçü təhsil işçisinin sanatoriya təəssüratları öyrənilib

Sağlamlığının bərpası məqsədilə “Günəşli” sanatoriyasında istirahət edən Göyçay rayonu Mallı Şıxlı kənd tam orta ümumtəhsil məktəbinin keçmiş direktoru, 43 illik əmək stajına malik təqaüdçü təhsil işçisi Tofiq İsmayılov ziyarət olunub.

Sanatoriya istirahətindən sonrakı təəssüratlarını öyrənmək məqsədilə ETİHİ Göyçay Rayon Komitəsinin sədri və komitə nümayəndələri onun evində olublar.

Səmimi görüş zamanı Tofiq İsmayılov göstərilən diqqət və qayğıya görə ETİHİ Göyçay Rayon Komitəsinə təşəkkürünü bildirib. O, “Günəşli” sanatoriyasında yaradılmış şəraitdən razı qaldığını, istirahətin sağlamlığının möhkəmlənməsinə və özünü daha gümrah hiss etməsinə müsbət təsir göstərdiyini qeyd edib.

Görüş zamanı Tofiq İsmayılovun təhsil sahəsində 43 illik səmərəli fəaliyyəti, Mallı Şıxlı kənd tam orta ümumtəhsil məktəbinə rəhbərlik etdiyi dövrdə gördüyü işlər və təhsil sahəsinə verdiyi töhfələr yüksək qiymətləndirilib. Bildirilib ki, uzun illər təhsil sistemində çalışan təqaüdçü müəllim və rəhbər şəxslərə diqqət və qayğı göstərilməsi ETİHİ Göyçay Rayon Komitəsinin fəaliyyətində mühüm yer tutur.

Sonda Tofiq İsmayılova möhkəm cansağlığı, firavan ömür və ailə xoşbəxtliyi arzulayıb, ona göstərdiyi dəyərli xidmətlərə görə təşəkkür ifadə olunub.

Şəhid anasının 65 illik yubileyi münasibətilə ziyarət həyata keçirilib

Bu gün Göyçay Peşə Liseyinin müəllimi, II Qarabağ müharibəsi şəhidi Kənan Ömərlinin anası, kitab müəllifi Ömərova Məhluqə xanımın 65 illik yubileyi münasibətilə ETİHİ Göyçay Rayon Komitəsinin sədri və komitə nümayəndələri onun evində olublar.

Görüş zamanı Məhluqə xanım yubileyi münasibətilə səmimi qəlbdən təbrik olunub, ona möhkəm cansağlığı, uzun ömür, ailə səadəti, yeni yaradıcılıq uğurları və pedaqoji fəaliyyətində davamlı nailiyyətlər arzulanıb.

Bildirilib ki, Məhluqə xanım Vətən uğrunda canını fəda etmiş qəhrəman övladın anası olmaqla yanaşı, uzun illər təhsil sahəsində səmərəli fəaliyyət göstərən müəllim və kitab müəllifi kimi də cəmiyyətdə böyük hörmət qazanıb. Qeyd olunub ki, şəhid ailələrinə göstərilən diqqət və qayğı dövlətimizin və cəmiyyətimizin hər zaman əsas dəyərlərindəndir.

Görüş zamanı şəhid Kənan Ömərlinin göstərdiyi qəhrəmanlıq da ehtiramla yad edilib. Qeyd olunub ki, o, Azərbaycan Respublikasının Prezidenti tərəfindən ölümündən sonra “Vətən uğrunda”, “Ağdamın azad olunmasına görə” medalları və III dərəcəli “Vətənə xidmətə görə” ordeni ilə təltif olunub. Bu ali təltiflər qəhrəman şəhidimizin Vətən qarşısındakı misilsiz xidmətlərinin dövlət tərəfindən yüksək qiymətləndirilməsinin bariz nümunəsidir.

Sonda ETİHİ Göyçay Rayon Komitəsinin sədri və nümayəndələri Məhluqə xanımı bir daha 65 illik yubileyi münasibətilə təbrik edərək ona sağlam, firavan və mənalı ömür, ailəsinə daim xoş günlər arzulayıblar.

Təhsil işçisinə doğum günü təbriki

Bu gün Göyçay rayonu Elnur Seyidov adına Ulaşlı Şıxlı kənd tam orta ümumtəhsil məktəbinin direktoru Mahmudova Aynur xanımın doğum günüdür.

Bu əlamətdar gün münasibətilə ETİHİ Göyçay Rayon Komitəsi Mahmudova Aynur xanımı səmimi qəlbdən təbrik edir, ona möhkəm cansağlığı, uzun ömür, ailə səadəti, xoşbəxtlik və firavan həyat arzulayır.

İnanırıq ki, Aynur xanımın təhsil sahəsindəki səmərəli fəaliyyəti, yüksək təşkilatçılıq bacarığı və məsuliyyətli rəhbərliyi bundan sonra da uğurla davam edəcək, rəhbərlik etdiyi təhsil müəssisəsi yeni nailiyyətlərə imza atacaqdır.

ETİHİ Göyçay Rayon Komitəsi Mahmudova Aynur xanıma gələcək fəaliyyətində yeni-yeni uğurlar, həyata keçirdiyi bütün işlərdə müvəffəqiyyət, şəxsi həyatında sevinc və xoş günlər arzulayır.

Doğum gününüz mübarək olsun, hörmətli Aynur xanım! Sizə möhkəm cansağlığı, tükənməz enerji və fəaliyyətinizdə daim uğurlar diləyirik.

Müəllim kollektivi üçün asudə vaxt gəzintisi təşkil edilib

Göyçay Rayon Komitəsinin təşkilati dəstəyi ilə 2 nömrəli körpələr evi–uşaq bağçasının müəllim kollektivi üçün asudə vaxtın səmərəli təşkili məqsədilə gəzinti təşkil olunub.

Səfər iştirakçıların gündəlik iş yükündən uzaqlaşaraq təbiətin gözəlliklərindən zövq almalarına, mənəvi istirahət etmələrinə və kollektiv həmrəyliyinin daha da möhkəmlənməsinə şərait yaradıb. Səmimi və xoş əhval-ruhiyyə şəraitində keçən gəzinti zamanı müəllimlər maraqlı söhbətlər edib, xatirə şəkilləri çəkdirib, birlik və əməkdaşlıq münasibətlərini daha da gücləndiriblər.

Belə sosial və mədəni tədbirlər kollektiv üzvlərinin motivasiyasının artırılması, sağlam istirahət vərdişlərinin təşviqi və iş mühitində müsbət atmosferin formalaşdırılması baxımından mühüm əhəmiyyət daşıyır.

2 nömrəli körpələr evi–uşaq bağçasının müəllim kollektivi göstərilən diqqət və qayğıya, eləcə də yaradılan xoş istirahət şəraitinə görə Göyçay RK-na səmimi minnətdarlığını bildirir. Bu cür təşəbbüslərin gələcəkdə də davam etdiriləcəyinə inam ifadə olunub.

Sənan Salehovun 65 illik yubileyi qeyd olunur

Göyçayda şahmat müəllimi Sənan Salehovun 65 illik yubileyi qeyd olunur

Göyçay rayonu Uşaq-Gənclər İdman-Şahmat Məktəbinin təcrübəli şahmat müəllimi Salehov Sənan Mirsaab oğlu 65 illik yubileyini qeyd edir.

Uzun illərdir ki, şahmatın inkişafı, bu intellektual idman növünün yeniyetmə və gənclər arasında təbliği istiqamətində yorulmadan çalışan Sənan müəllim peşəkarlığı, yüksək pedaqoji bacarığı və zəngin təcrübəsi ilə seçilən müəllimlərdəndir. O, fəaliyyəti dövründə yüzlərlə şagirdə şahmatın sirlərini öyrədərək onların məntiqi düşüncə tərzinin formalaşmasına, analitik təfəkkürünün inkişafına və yarış təcrübəsi qazanmasına mühüm töhfələr verib.

Sənan müəllimin rəhbərliyi ilə hazırlanan şahmatçılar müxtəlif rayon, respublika və digər səviyyəli yarışlarda iştirak edərək uğurlu nəticələr əldə edib, Göyçay şahmat məktəbinin nüfuzunun yüksəlməsində öz paylarını veriblər. Onun gənc şahmatçıların tərbiyəsində göstərdiyi əzm, səbir və məsuliyyət həm valideynlər, həm də həmkarları tərəfindən daim yüksək qiymətləndirilib.

Şahmatın yalnız idman növü deyil, həm də düşüncə, intizam və strateji qərarvermə məktəbi olduğunu hər zaman ön plana çəkən Sənan müəllim bu dəyərləri illər boyu yetişdirdiyi şagirdlərə aşılayaraq onların hərtərəfli inkişafına xidmət edib.

65 illik yubileyi münasibətilə Salehov Sənan Mirsaab oğlunu səmimi qəlbdən təbrik edir, ona möhkəm cansağlığı, uzun ömür, ailə səadəti və gələcək fəaliyyətində yeni uğurlar arzulayırıq. Arzu edirik ki, onun zəngin təcrübəsi bundan sonra da Göyçayda şahmatın inkişafına və yeni istedadların yetişməsinə öz töhfəsini verməyə davam etsin.

65 illik yubileyiniz mübarək!

Müəllimlərin fikirləri: Təşəkkür və ehtiram

Göyçay rayonundan bir qrup müəllim olaraq 20–26 iyul tarixlərində Təhsil İstirahət Mərkəzində unudulmaz istirahət günləri keçirdik. Bu müddət ərzində bizim üçün yaradılan rahat şərait, yüksək səviyyəli xidmət, səmimi münasibət və qonaqpərvərlik hər birimizdə xoş təəssüratlar yaratdı.

İstirahət proqramı çərçivəsində təşkil olunan müxtəlif idman və intellektual yarışlar müəllimlər arasında həm sağlam rəqabət, həm də dostluq və həmrəylik ruhunu daha da gücləndirdi. Böyük sevinc hissi ilə bildiririk ki, komandamız intellektual yarışda yüksək bilik və hazırlıq nümayiş etdirərək I yerə layiq görüldü. Bununla yanaşı, voleybol yarışında da böyük əzmkarlıq və komanda ruhu göstərərək II yerin qalibi olduq. Bu nailiyyətlər bütün iştirakçılar üçün qürurverici olmaqla yanaşı, müəllimlər arasında birlik, əməkdaşlıq və qarşılıqlı dəstəyin gözəl nümunəsinə çevrildi.

Bu uğurların əldə olunmasında əməyi olan bütün komanda üzvlərinə təşəkkür edir, yarışların yüksək səviyyədə təşkilinə görə təşkilatçılara və Təhsil İstirahət Mərkəzinin kollektivinə minnətdarlığımızı bildiririk.

Bizə göstərilən diqqət və qayğı, yaradılan səmimi mühit, maraqlı tədbirlər və mənalı istirahət proqramı bu günləri hər birimiz üçün yaddaqalan etdi. Əminik ki, burada qazandığımız xoş xatirələr, yeni dostluqlar və əldə etdiyimiz uğurlar uzun illər yaddaşımızda yasayacaq.Həmkarlar İttifaqına təşəkkürümüzü bildiririk.

45 illik yubiley: İlahə Eldarbəyliyə xoş arzular

Qarabaqqal kənd uşaq bağçasının müdiri İlahə Eldarbəylinin 45 yaşı tamam olur.

Bu əlamətdar gün münasibətilə ETİHİ Göyçay Rayon Komitəsi adından İlahə xanımı səmimi qəlbdən təbrik edir, ona möhkəm can sağlığı, uzun ömür, ailə səadəti və gələcək fəaliyyətində yeni-yeni uğurlar arzulayırıq.

İlahə Eldarbəyli uzun illərdir təhsil sahəsində məsuliyyət və fədakarlıqla çalışaraq məktəbəqədər təhsilin inkişafına, uşaqların hərtərəfli formalaşmasına və sağlam təlim-tərbiyə mühitinin yaradılmasına öz töhfəsini verməkdədir. Onun rəhbərlik etdiyi Qarabaqqal kənd uşaq bağçasında uşaqların bilik və bacarıqlarının inkişafı, milli-mənəvi dəyərlərə bağlı, vətənpərvər ruhda yetişdirilməsi istiqamətində görülən işlər yüksək qiymətləndirilir.

Əminik ki, İlahə xanım bundan sonra da öz zəngin təcrübəsi, peşəkarlığı və məsuliyyətli fəaliyyəti ilə məktəbəqədər təhsilin inkişafına dəyərli töhfələr verməyə davam edəcək.

ETİHİ Göyçay Rayon Komitəsi olaraq bir daha İlahə Eldarbəylini 45 illik yubileyi münasibətilə ürəkdən təbrik edir, ona möhkəm cansağlığı, xoşbəxtlik, firavan həyat və bütün işlərində uğurlar arzulayırıq.

Hörmətli İlahə xanım, 45 illik yubileyiniz mübarək! Yeni yaşınız sizə sevinc, uğur və gözəl nailiyyətlər gətirsin!

Göyçayda “Bilik marafonu” keçirilib

Göyçay Gənclər Evi,Elm və Təhsil İşçiləri Həmkarlar İttifaqı Göyçay Rayon Komitəsi və Göyçay rayonu üzrə Gənclər və İdman Sektorunun birgə təşkilatçılığı ilə gənclər arasında “Bilik marafonu” adlı intellektual yarış keçirilib.

Layihənin əsas məqsədi gənclərin intellektual potensialının inkişafına töhfə vermək, onların məntiqi təfəkkürünü və komanda şəklində işləmək bacarıqlarını gücləndirmək, eyni zamanda asudə vaxtlarının səmərəli və maraqlı təşkilini təmin etmək olub.

Yarış iştirakçıları müxtəlif mövzuları əhatə edən suallar üzrə bilik və bacarıqlarını nümayiş etdirərək gərgin mübarizə aparıblar. Maraqlı və rəqabət şəraitində keçən yarışın sonunda ən yüksək nəticə göstərən iştirakçılar müəyyənləşdirilərək hədiyyə və sertifikatlarla mükafatlandırılıblar.

Tədbirdə çıxış edən təşkilatçılar bu cür intellektual layihələrin gənclərin bilik səviyyəsinin artırılması, sağlam rəqabət mühitinin formalaşdırılması və onların ictimai fəallığının yüksəldilməsi baxımından xüsusi əhəmiyyət daşıdığını vurğulayıblar.